Quintina

Quintina hè un quartettu feminile di polifunie di Corsica è di u mondu. E quattru cantatrici, unite da a so passione pè a bellezza è a magia di l’armunia vocale, anu una stessa vulintà : quella di cunnosce è fà cunnosce sti canti chì, in Corsica cum’è à traversu u mondu, cuntanu è celebranu a vita cutidiana, da l’amore à u dolu, da a pace à a rivolta, da e gioie à e brame, da u mondu pasturale à a mudernità.

E quattru giovani donne anu sceltu di battezzà u so gruppu Quintina, vale à dì « a voce di l’anghjulu », sta singularità musicale propria à a polifunia, sta quinta voce, acuta è cristallina, chì sboccia qualchì volta quandu quattru voce risunanu in armunia. Hè à tempu u più bellu misteru di a polifunia, a manifestazione a più pura di l’armunia, è u simbulu di l’unità di u gruppu.

U ripertoriu di Quintina hè un invitu à tuffassi in core à a ricchezza di i canti polifonichi isulani : da u prufanu à u sacru, da u pupulare à u sapiente, da u tradiziunale à e creazioni recente nate da u Riacquistu. Ma u so cuncertu serà ancu un invitu à viaghjà per scopre canti polifonichi d’altre culture è d’altri populi à traversu u mondu : sardi, baschi, georgiani, bulgari o ancu zingari. U quartettu vole fà dialogà a musica isulana cù sti canti chì sò una surgente d’apertura, d’evoluzione è d’arricchimentu, ma ancu di capiscitura di sè stessu è di u mondu.

Quintina hè cumpostu da Stéphanie De Cicco, Laurence Felici, Nathalie Gareddu, Marie-Ange Campinchi è Serena Bozzi.