A storia di u nostru festivale

Chì postu hà a musica classica in Corsica ?

Sacha : Ci hè un grande amore per e voce ma a musica strumentale classica hè praticamente inesistente fora di qualchi festivali è di i centri maiò d'Aiacciu è di Bastia.

Hugo : Eramu in Corsica durante u cunfinamentu, è avemu avutu voglia di sustene a prufessione è tutti i ghjovani chì, cum'è noi, ùn pudianu più esercità u so mestieru : ci simu messi a imaghjinà un festivale in a nostra magnifica regione di l'Ovest Corsu è hè cusì ch'hè natu Corsica Cantabile.

Cumu avete francatu u passu ?

Hugo : A nostra forza stà in a nostra cunniscenza intima di a Corsica Occidentale: avemu trovu prestu sustegnu, postu chì l'autorità lucali sò state cunquistate da stu prughjettu purtatu da dui ghjovani artisti isulani.

Sacha : È funziona ! I ritorni di l'artisti è di u publicu sò veramente entusiasti. U festivale hà sappiutu ancorassi in a vita di i residenti di a micro-regione, ma ancu di tutta a Corsica.

Chì musica vulete prupone ?

Sacha : Ciò chì vulemu purtà hè a musica cum'è l'amemu è a sunamu, musica di camera per i scambii è l'incontri chì sti picculi gruppi permettenu.

Hugo : Vulemu offre assai di più chè què, vulemu creà ponti trà culture è musicanti: benintesa musica classica, attraversu musica da camera è opera, ma vulemu ancu mette a Corsica à u centru di a prugrammazione, cum'è una spezia in un piattu per arricchiscelu.

Sacha : Hè impurtante ! Ùn scurdemu micca e nostre radiche, a cultura Corsa hè è sarà sempre una linea artistica di a nostra prugrammazione, hè ciò chì a ghjente vene à circà da noi è hè a nostra identità. Tenemu a ch'ogni musicista porti un pocu di ellu stessu, di a so cultura, di e so urigine in i nostri prugrammi. A musica classica hè u nostru vettore cumunu è circemu d'avè una singularità, un picculu più chì l'altri festivali di musica classica di Francia ùn cercanu micca forzatamente.

Chì sò l'artisti di Corsica Cantabile ?

Sacha : Hugo hà studiatu a Parigi è eiu à Lionu, semu in cuntattu cù musicisti talentuosi a l'alba di a so carriera, anzi digià ben installati è chì sò pronti a lancià si in un'avventura un pocu sfarente. Vulemu creà una emulazione trà i ghjovani musicisti, i talenti internaziunali è sicuru di Corsica.

Hugo : Campemu qualchi ghjornu in cumunità a Piana è à u Cunventu San Francescu di Vicu, hè un mumentu di spartimentu, ma ancu di travagliu intensu per l'artisti, tutti sò maravigliati è inspirati da a bellezza è l'autenticità di a regione.

Mettete particulamente l'artisti corsi in avanti, perchè ?

Sacha : Simu ben cuscenti chì ùn hè micca faciule di praticà o studià a musica, è ancu menu a musica classica, in Corsica: micca tutti l'istrumenti sò pruposti in i cunservatorii corsi, è a cumunità ferma abbastanza chjusa, ancu s'ella hè in cambiamentu. Hè per quessa chì, cù grande rammaricu, avemu decisu di lascià l'isula per perseguite i nostri studii musicali è apprufundisce a nostra passione.

Hugo : Per noi, era dunque impurtante chì u festivale mettessi in risaltu l'artisti lucali chì anu poche opportunità di fà spettaculi in casa.

Sacha : Vulemu andà più luntanu creendu opportunità per i musicanti corsi di scuntrà si, postu chì parechji sò isulati. Ùn ci cunniscimu micca necessariamente tutti, essendu spessu spargugliati, è a Corsica Cantabile duveria diventà u nostru puntu d'ancora. Ci hè tantu talentu quì!

Hugo : I Concerti Cantabile, chì anu custituitu a nostra ramificazione 2024 di u festivale in u cuntinente, è più precisamente in a Sala Cortot in Parigi, ci anu permessu di mette in risaltu artisti isulani cum'è Michelle Fieschi, Amélie Tatti, Noélia de Freitas, è noi stessi. Sta visibilità data à sti talenti hè essenziale in una prufessione cum'è a nostra, chì si basa principalmente nantu à l'incontri è a coglie opportunità.