Messa in scena da Béatrice Lafont / Cù Iris Guémy, violoncello, Camille Théveneau, viulinu è Adrien Gey-Galera, pianoforte. Pruduzzione : Les Concerts Cantabile

Suspense musicale per pianoforte, viulinu è violoncello, à partesi da u Trio Dumky d’Anton Dvořák. Scrittu è messu in scena da Béatrice Lafont.

I cuncerti si tenenu da u 16 di settembre à u 26 d’uttrovi : i luni à 19h è i sabbati à 16h30, pause 21,23/09 è 14/10.

A musica, nanzu à a musica Ci hè statu prima di tuttu u desideriu di dà à vede, à sente è à sperimentà, in un linguaghju teatrale, ciò chì hè di solitu invisibile: di chì hè fatta a musica nanzu à u mumentu di u cuncertu, ciò ch’ella schizza per via di u so putere d’evucazione, i muvimenti interiori, l’emuzione ch’ella pò suscità, è chì ogni spettatore a possi scopre in a libertà d’una sperienza intima. I “prolégomènes” designanu i preparativi, i preambuli, i preliminarii. Cusì custituiscenu a prima parte di u spettaculu, a seconda parte palesendu u Trio Dumky sunatu in a so integrità.

Trè musicanti si prestanu à u ghjocu L’interpreti sò u veru sughjettu di u spettaculu. Accittendu di cunfruntà a so pratica cù u ghjocu teatrale, danu à a musica tutta a so umanità. In fatti, a scrittura di u spettaculu s’hè nutrita di a so percezzione di l’opera di Dvořak, di a so manera particulare di campà la à u corsu di u travagliu, è dinù di e so persunalità rispettive. A partitura teatrale di u spettaculu hè ancu strettamente ligata à a musica stessa. In quella includu micca solu l’universu particulare di u Trio Dumky, ma ancu u fenomenu fisicu, carnale, per u quale ella accade in u so scontru cù l’interpretu è u so strumentu, a so risonanza in u so corpu, in a so anima, è tutte e peripezie ch’ella attraversa nanzu d’esse data à u publicu. E so crampe, a so fatica, a so fame è e so paure sò state un materiale teatrale privilegiatu, ma dinù u so piacè, a so eccitazione, a so gioia.

U Trio Dumky d’Anton Dvořák Hè cumpostu di sei muvimenti, ognunu essendu una dumka, da u nome d’una danza pupulare slava, a parolla dumky designendu i “stati d’anima”. U trio di Dvořák hè tissutu d’ombre è di luci, di allegria è di tristezza, d’interiorità è di sbocchi giubilanti. Hè què chì tocca è stupisce in sta musica, a so versatilità, i so rivolgimenti, e so piruette fantasiose chì spuntanu da a malincunia a più prufonda, cum’è un’ecu d’una zitellina chì ùn vole sente parlà d’altru chè di a so gioia sfrenata è testarda.

Forma generale Sti prolégomènes, articulati in quadri, declinanu u percorsu di i trè musicanti in u core stessu di a partitura. Stu percorsu, di u quale a molla hè u travagliu di decifrazione, di ripetizione è d’interpretazione, imprime à u spettaculu un muvimentu chì và da un registru realistu à un registru più intimu è oniricu, facendu vibrà stu filu nant’à u quale l’interpretu oscilla, ghjucendu si di a gravità quant’è s’ellu ci si sottumette senza tregua. Ispirendu si à una citazione di Jiri Trnka, “u cuncretu hè a cundizione di u maravigliosu”, u spettaculu si sviluppa in un muvimentu chì và da u più cuncretu à u più spugliatu. I quadri si succèdinu in modu più o menu cuntrastatu o fusu, facendu alternà scene dialogate, travagliu musicale, sogni, monologhi interiori. In a seconda parte, u palcuscenicu hè spugliatu di ogni dettu realistu, fora di l’istrumenti; u pianu è i muri sò cum’è cancellati, i corpi, i visi è l’istrumenti solu schizzati, affinchì, quant’è pussibule, nunda ùn possi interferisce trà u publicu è a musica.