Certi lochi parenu cunservà intatta a memoria di i seculi. U Cunventu San Francescu di Vicu ne hè unu di i più eloquenti. Fundatu in u 1481 da u signore Giovan Paolo de Leca pè i Franciscani, poi occupatu da u 1836 da i Missionarii Oblati di Maria Immaculata, oghje offre un scrignu di silenziu, di storia è di spiritualità. Hè in stu quadru impregnatu di raccoglimentu chì Corsica Cantabile face spuntà sta sera un’altra grande figura di l’imaginariu corsu : Colomba.

Quandu Prosper Mérimée scopre a Corsica in u 1839, hè prufundamente marcatu da a forza di e tradizioni isulane, da l’impurtanza data à l’onore è à a memoria famigliale. Ispiratu da a storia vera di Colomba Carabelli in Fozzano, u so rumanzu dà nascita à un’eroina diventata emblematica : una donna ardente è inflessibile, guardiana di l’usanze è voce di a vindetta. À traversu ella si cristallizeghjanu valori prufundamente arradicati in a cultura corsa : fideltà à l’antenati, sensu di l’onore, putenza di u dolu. In a sucetà isulana, a donna occupa in effetti un postu essenziale in a trasmissione di a memoria famigliale. Guardiana di u focu è depositaria di u ricordu di e sterpe, ella porta dinù u cantu di u voceru, sta lagnanza funebre induve si mischjanu dulore, memoria è chjama à a ghjustizia. Colomba incarna sta memoria viva, tesa trà suffrenza è fideltà.

U prugramma di sta sera si sviluppa cusì cum’è un ritrattu musicale di sta figura à tempu tragica è putente. Si apre nantu à un Tema è variazioni nantu à u Dio vi salvi regina, innu corsu emblematicu, in un arrangiamentu di u pianistu Teva Mazoyer, chì iscrive da subitu l’ascoltatore in core à l’anima isulana. U Crisantemi di Puccini, elegia d’una prufonda malincunia, evoca u dolu è u ricordu. I Jeux d’eau di Ravel portanu dopu una respirazione luminosa è puetica, prima chì a Dumka di u Quintette di Dvořák faccia sente una introspezione straziante induve si rispondenu nostalgia è slanciu vitale, in una risonanza singulare cù a figura di Colomba.

Metta Colomba in musica, hè fà risunà una figura induve u dulore diventa forza, induve a memoria si trasforma in destinu, è induve a voce di e tradizioni cuntinueghja à traversà u tempu.

Localisation

819 Route du Couvent St-François 20160 Vico France GPS : 42,16080° N, 8,80081° E